سنہ (۱) ہجری کے اہم واقعات
حنین کے قیدیوں کو لائے جانے اور ان کی قبولِ اسلام کی بیعت کا بیان اور اس صحابی کا واقعہ جس نے نذر مانی تھی کہ اگر وہ آدمی ہمارے پاس لا یا گیا جو آج سارا دن ہم پر زور دار حملے کرتا رہا تو میں اس کی گردن اڑاؤں گا
سیدنا انس بن مالک رضی اللہ عنہ سے مروی ہے کہ ان سے علاء بن زیاد عدوی نے دریافت کیا اور کہا: اے ابو حمزہ! کیا آپ نے رسول اللہ صلی اللہ علیہ وآلہ وسلم کے ہمراہ کسی غزوہ میں شرکت کی؟ انہوں نے کہا: جی ہاں! میں نے آپ صلی اللہ علیہ وآلہ وسلم کے ساتھ غزوۂ حنین میں شرکت کی تھی۔ مشرکین بہت بڑی تعداد میں ہمارے مقابلے کو نکلے اور ہمارے اوپر حملہ آور ہوئے، یہاں تک کہ ہم نے اپنے گھوڑوں کو اپنے پیچھے دیکھا، مشرکین میں سے ایک آدمی بڑھ چڑھ کر ہم پر حملے کر رہا اور نقصان پہنچا رہا تھا، اللہ کے نبی صلی اللہ علیہ وآلہ وسلم نے یہ منظر دیکھا تو آپ صلی اللہ علیہ وآلہ وسلم خچر سے نیچے اترے اور اللہ تعالیٰ نے مشرکینکو ہزیمت سے دوچار کیا اور وہ پیٹھ دے کر بھاگ کھڑے ہوئے۔ اللہ کے نبی صلی اللہ علیہ وآلہ وسلم نے جب فتح دیکھی تو آپ صلی اللہ علیہ وآلہ وسلم کھڑے ہو گئے، ان کے قیدیوں کو ایک ایک کر کے آپ صلی اللہ علیہ وآلہ وسلم کی خدمت میں لایا گیا تو وہ قبولِ اسلام کی بیعت کرنے لگے۔ اصحابِ رسول میں سے ایک آدمی نے کہا: میری نذر ہے کہ اگر وہ آدمی لایا گیا جو آج سارا دن ہم پر حملے کر کے شدید نقصان پہنچاتا رہا تو میں اس کی گردن اُڑا دوں گا۔ ا س کی بات سن کر اللہ کے نبی صلی اللہ علیہ وآلہ وسلم خاموش رہے، بالآخر وہی آدمی لایا گیا، اس نے جب اللہ کے رسول صلی اللہ علیہ وآلہ وسلم کو دیکھا تو فوراً کہنے لگا: اے اللہ کے نبی! میں اللہ کی طرف توبہ کرتا ہوں، اے اللہ کے نبی! میں اللہ کی طرف توبہ کرتا ہوں۔ اللہ کے نبی کچھ دیر تک رکے رہے اور اس کی بیعت قبول نہیں کی تاکہ دوسرا آدمی اپنی نذر پوری کر لے اور وہ آدمی نبی کریم صلی اللہ علیہ وآلہ وسلم کی طرف دیکھنے لگا کہ آپ اسے قتل کا حکم دیں تو وہ اسے قتل کرے۔ وہ نبی کریم صلی اللہ علیہ وآلہ وسلم سے مرعوب ہو کر اسے قتل کرنے کی جسارت نہیں کر سکا، جب اللہ کے نبی نے دیکھا کہ وہ آدمی کچھ کارروائی نہیں کر رہا تو آپ صلی اللہ علیہ وآلہ وسلم نے اس کی بیعت قبول کر لی۔ اس نے عرض کیا: اللہ کے رسول! اور میری نذر؟ آپ صلی اللہ علیہ وآلہ وسلم نے فرمایا: میں آج اس کی بیعت قبول کرنے میں دیر کرتا رہا تاکہ تم اپنی نذر پوری کر لو۔ وہ بولا: اے اللہ کے نبی! آپ نے مجھے اشارہ ہی کر دیا ہوتا، آپ صلی اللہ علیہ وآلہ وسلم نے فرمایا: نبی کو روانہیں کہ وہ اس طرح خفیہ اشارے کر ے۔