فضائل قرآن ،دعاؤں ،اذکار اور دَم کا بیان - فضائل قرآن ،دعاؤں ،اذکار اور دَم کا بیان - Book 22 of Silsila Sahih with Urdu and English Translation

ابو ہریرہ‌رضی اللہ عنہ سے مرفوعا مروی ہےکہ: جو قوم کسی مجلس میں بیٹھی اور اس میں اللہ کا ذکر کیا تو فرشتے انہیں ڈھانپ لیتے ہیں، رحمت ان پر چھا جاتی ہے اور ان پر سکینت نازل ہوتی ہے اور اللہ عزوجل اپنے پاس موجود لوگوں میں ان کا ذکر کرتاہے

انس‌رضی اللہ عنہ سے مرفوعا مروی ہےکہ: جو لوگ اللہ کا ذکر کرنے کے لئے بیٹھتے ہیں تو آسمان سے ایک ندا دینے والا ندا دیتاہے: کھڑے ہو جاؤ، تمہیں بخش دیا گیا، تمہاری برائیاں نیکیوں سے بدل دی گئیں۔

ابو ہریرہ‌رضی اللہ عنہ سے مرفوعا مروی ہےکہ: جو قوم کسی مجلس میں بیٹھ کر اللہ کا ذکر نہیں کرتی اور نہ نبی ‌صلی اللہ علیہ وسلم ‌پر درود بھیجتی ہے تو وہ مجلس قیامت کے دن ان کے لئے حسرت کا باعث ہوگی، اگر چہ وہ ثواب کی وجہ سے جنت میں داخل ہو جائیں

ابو ہریرہ‌رضی اللہ عنہ سے مرفوعا مروی ہےکہ: جو شخص مجھے سلام بھیجتا ہے تو اللہ تعالیٰ میری روح مجھ میں واپس لوٹا دیتا ہے حتی کہ میں اسے جواب دیتا ہوں

ابو ہریرہ‌رضی اللہ عنہ سے مروی ہے کہ رسول اللہ ‌صلی اللہ علیہ وسلم ‌نے فرمایا: کوئی دعا جو بندہ کرتا ہے اس دعا سے افضل نہیں: اے اللہ میں تجھ سے دنیا اور آخرت میں عافیت کا سوال کرتا ہوں

عبداللہ بن مغفل رضی اللہ عنہ سے مروی ہے کہتے ہیں کہ رسول اللہ ‌صلی اللہ علیہ وسلم ‌نے فرمایا: جو لوگ کسی مجلس میں جمع ہوتے ہیں اور پھر الگ ہو جاتے ہیں لیکن اللہ کا ذکر نہیں کرتے تو وہ مجلس قیامت کے دن ان کے لئے حسرت کا باعث ہوگی۔

عبداللہ بن عمرو رضی اللہ عنہما سے مرفوعا مروی ہے کہ: جو لوگ کسی مجلس میں بیٹھتے ہیں اور اس میں اللہ کا ذکر نہیں کرتے تو وہ قیامت کے دن حسرت محسوس کریں گے

ابو ہریرہ‌رضی اللہ عنہ سے مرفوعا مروی ہے کہ: جولوگ کسی مجلس سے کھڑے ہوتے ہیں اس مجلس میں اللہ کا ذکر نہیں کرتے تو گویا وہ لوگ کسی مردہ گدھے کے پاس سے کھڑے ہوتے ہیں،اور وہ مجلس قیامت کے دن ان کے لئے حسرت کا باعث ہوگی۔

معاذ‌رضی اللہ عنہ سے مروی ہے کہ رسول اللہ ‌صلی اللہ علیہ وسلم ‌نے فرمایا:جو مسلمان پاکیزگی کی حالت میں(اللہ)کے ذکر پر رات گزارتا ہے۔تو جب وہ رات کو اٹھتا ہے، پھر اللہ تعالیٰ سے دنیا اور آخرت کی بھلائی کا جو بھی سوال کرتا ہے اللہ تعالیٰ اسے عطا کر دیتا ہے

انس بن مالک ‌رضی اللہ عنہ سے مروی ہے کہ رسول اللہ ‌صلی اللہ علیہ وسلم ‌نے فاطمہ رضی اللہ عنہا سے فرمایا: جو نصیحت میں تمہیں کر رہا ہوں تم اسے سنتی کیوں نہیں؟ جب تم صبح یا شام کرو تو کہو: اے زندہ اور قائم رہنے والے !تیری رحمت کے ذریعے ہی میں مدد طلب کرتی ہوں، میری تمام حالت درست کر دے اور کبھی بھی پلک جھپکنے کے برابر مجھے میرے نفس کے سپرد نہ کر

جریر‌رضی اللہ عنہ سے مروی ہے کہتے ہیں کہ نبی ‌صلی اللہ علیہ وسلم ‌کچھ عورتوں کے پاس سے گزرے تو ان پر سلام کہا۔( )

کعب بن عجرہ رضی اللہ عنہ سے مرفوعا مروی ہے کہ:باقی رہنے والی نیکیاں، ان کا کہنے والا یا کرنے والا ناکام نہیں ہوتا، ہر فرض نماز کے بعد تینتیس مرتبہ سبحان اللہ ،تینتیس مرتبہ الحمدللہ، اور چونتیس مرتبہ اللہ اکبر

زبیر بن عوام‌رضی اللہ عنہ سے مرفوعا مروی ہے کہ: جو شخص اس بات کو پسند کرتا ہے کہ اس کا اعمال نامہ اسے اچھا لگے تو وہ کثرت سے استغفار کرے

عبداللہ بن مسعود‌رضی اللہ عنہ سے مروی ہے کہتے ہیں کہ رسول اللہ ‌صلی اللہ علیہ وسلم ‌مسجد میں داخل ہوئے، آپ ابو بکر اور عمر رضی اللہ عنہما کے درمیان میں تھے۔ ارو اس وقت عبداللہ بن مسعود نماز میں کھڑے ہو کر سورۂ نساء کی تلاوت کررہے تھے۔ جب سو آیات مکمل کر لیں تو عبداللہ بن مسعود رضی اللہ عنہ دعا کرنے لگے: وہ نماز میں کھڑے تھے۔ نبی ‌صلی اللہ علیہ وسلم ‌نے فرمایا: مانگو تمہیں عطا کیا جائے گا۔ مانگو تمہیں عطا کیا جائے گا۔ پھر فرمایا؛ جو شخص اس بات کو پسند کرتا ہے کہ قرآن اس طرح پڑھے جس طرح نازل ہو اہے تو وہ ام عبد کے بیٹے (ابن مسعود رضی اللہ عنہ ) کی قراءت پر قرآن پڑھے۔ جب صبح ہوئی تو ابو بکر رضی اللہ عنہ انہیں خوشخبری دینے کے لئے گئے اور ان سے کہا: تم نے اللہ تعالیٰ سے کل رات کیا مانگا تھا؟ عبداللہ بن مسعود رضی اللہ عنہ کہتے ہیں کہ میں نے کہا: اے اللہ! مجھے ایسا ایمان عطا کر جس میں ارتداد نہ ہو، اور ایسی نعمت عطا کر جو ختم نہ ہو، اور جنت خلد کے اعلی حصے میں محمد ‌صلی اللہ علیہ وسلم ‌کی رفاقت عنایت فرما۔ پھر عمر‌رضی اللہ عنہ آئے تو ان سے کہا گیا: ابو بکر رضی اللہ عنہ آپ سے سبقت لے گئے ہیں۔ عمر‌رضی اللہ عنہ نے کہا: اللہ تعالیٰ ابو بکر رضی اللہ عنہ پر رحم فرمائے، میں جب بھی کسی نیکی کی طرف بڑھا ابو بکر رضی اللہ عنہ مجھ سے سبقت لے گئے۔

عائشہ رضی اللہ عنہا سے مرفوعا مروی ہے کہ: جس شخص نے قرآن کی ابتدائی سات سورتیں سیکھ لیں وہ عالم ہے۔

ابو درداء‌رضی اللہ عنہ سے مروی ہے کہ رسول اللہ ‌صلی اللہ علیہ وسلم ‌نے فرمایا: جس شخص نے تعلیم قرآن پر ایک کمان بھی لی تو اللہ تعالیٰ قیامت کے دن اس کی گردن میں آگ کی کمان ڈالے گا

جابر بن عبداللہ رضی اللہ عنہما سے مروی ہے کہتے ہیں :نبی ‌صلی اللہ علیہ وسلم ‌نے بنی عمرو کے لئے سانپ کے دم کی رخصت دی تھی۔ ابو زبیر نے کہا: میں نے جابر بن عبداللہرضی اللہ عنہما سے سنا کہہ رہے تھے: ہم میں سے ایک آدمی کو بچھو نے کاٹ لیا، ہم رسول اللہ ‌صلی اللہ علیہ وسلم ‌کے ساتھ بیٹھے تھے۔ ایک آدمی نے کہا: اے اللہ کے رسول! کیا میں دم کر دوں؟ آپ ‌صلی اللہ علیہ وسلم ‌نے فرمایا: تم میں سے جو شخص اپنے بھائی کو نفع پہنچا سکتا ہے وہ اسے نفع پہنچائے

مغیرہ بن شعبہ‌رضی اللہ عنہ سے مرفوعا مروی ہےکہ: جس شخص نے داغ لگایا یا دم کروایا وہ تو کل سے نکل گیا

ابو سعید خدری‌رضی اللہ عنہ سے مروی ہے کہتے ہیں کہ رسول اللہ ‌صلی اللہ علیہ وسلم ‌نے فرمایا: جس شخص نے وضو کیا پھر کہا: اے اللہ تو اپنی تعریف کے ساتھ پاک ہے ، تیرے علاوہ کوئی سچا معبود نہیں، میں تجھ سے بخشش طلب کرتا ہوں، اور تجھ سے توبہ کرتا ہوں۔ تو اسے( جہنم سے) آزاد لوگوں میں لکھ دیا جاتا ہے۔ اور ایک مہر لگا دی جاتی ہے جو قیامت تک نہیں توڑی جاتی

عمر‌رضی اللہ عنہ سے مروی ہے کہتے ہیں کہ رسول اللہ ‌صلی اللہ علیہ وسلم ‌نے فرمایا: جو شخص کسی بازار میں داخل ہوا اور کہا:اللہ کے علاوہ کوئی سچا معبود نہیں، وہ اکیلا ہے ،اس کا کوئی شریک نہیں، اسی کے لئے بادشاہت ہے اور اور اسی کے لئے تعریف اور وہ ہر چیز پر قادر ہے ۔اللہ تعالیٰ اس کے لئے دس لاکھ نیکیاں لکھ دیتا ہے اور اس کی دس لاکھ برائیاں مٹا دیتا ہے