بیماری، جنازے اور قبروں کا بیان - بیماری، جنازے اور قبروں کا بیان - Book 25 of Silsila Sahih with Urdu and English Translation

عامر بن سعد اپنے والد رضی اللہ عنہ سے بیان كرتے ہیں، كہتے ہیں كہ ایك بدو نبی ‌صلی اللہ علیہ وسلم ‌كے پاس آیا اور كہا: میرا والد صلہ رحمی كرتا تھا، اور یہ كرتا تھا، وہ كرتا تھا۔ وہ كہاں ہے؟ آپ صلی اللہ علیہ وسلم نے فرمایا: آگ میں۔ اعرابی كو غصہ آگیا۔ اس نے كہا: آپ كا باپ كہاں ہے؟ آپ صلی اللہ علیہ وسلم ‌نے فرمایا: جب تم كسی كافر كی قبر كے پاس سے گزرو تو اسے آگ كی خوشخبری دو، وہ اعرابی اس كے بعد مسلمان ہو گیا، اور كہتا تھا كہ رسول اللہ ‌صلی اللہ علیہ وسلم ‌نے ایك مشكل كام مجھے سونپ دیا ہے۔ میں جس كافر كی قبر كے پاس سے گزرتا ہوں اسے آگ كی خوشخبری دیتا ہوں۔

عثمان بن عفان رضی اللہ عنہ سے مرفوعا مروی ہے كہ: مؤمن کے لئے بخار قیامت کے دن آگ کے حصے کا بدلہ ہے۔

ابو امامہ رضی اللہ عنہ سے مرفوعا مروی ہے كہ:بخار جہنم كی بھٹی ہے اس میں سے مومن كو جتنا بخار ہوتا ہے وہ آگ میں سے اس كا حصہ ہے(جو اسے دنیا میں مل جاتا ہے اور آخرت میں وہ محفوظ ہوجاتا ہے)۔

ابو سعید خدری‌رضی اللہ عنہ سے مرفوعا مروی ہے كہ: پانچ اعمال ایسے ہیں جس شخص نے یہ اعمال ایك دن میں كئے اللہ تعالیٰ اسے اہل جنت میں سے لكھ دیں گے۔ جس شخص نے مریض كی عیادت كی، جنازے میں شریك ہوا، اس دن روزہ ركھا ،جمعہ کے دن خوشی خوشی نماز کے لئے گیااور ایك غلام آزادكیا۔

جابر بن عبدالل رضی اللہ عنہما كہتے ہیں كہ نبی ‌صلی اللہ علیہ وسلم ‌بنو نجار كے كھجور كے باغ میں داخل ہوئے، تو بنی نجار كے ان آدمیوں كی آوازیں سنیں جوجاہلیت میں مر گئے تھے۔ انہیں ان كی قبروں میں عذاب دیا جا رہا تھا۔ رسول اللہ ‌صلی اللہ علیہ وسلم ‌گھبرا كر باہر نكل آئے۔ اور اپنے صحابہ كو حكم دیا كہ وہ عذاب قبر سے پناہ مانگیں

انس‌رضی اللہ عنہ سے مروی ہے كہ:خالد بن ولید اور عبدالرحمن بن عوف رضی اللہ عنہما كے درمیان تلخ كلامی ہوگئی۔خالد رضی اللہ عنہ نے عبدالرحمن رضی اللہ عنہ سے كہا: تم اپنےسبقت والے دنوں كی وجہ سے ہمارے بڑے بن رہے ہو؟ نبی ‌صلی اللہ علیہ وسلم ‌سے اس بات كا تذكرہ كیا گیا۔ آپ صلی اللہ علیہ وسلم نے فرمایا: میری خاطر میرے صحابہ کو اور مجھے (ہمارے حال پر) چھوڑ دو اس ذات كی قسم جس كے ہاتھ میں میری جان ہے! اگر تم احد كے برابر یا پہاڑوں كے برابر سونا خرچ كرو تب بھی تم ان كے اعمال تك نہیں پہنچ سكتے

عبداللہ بن محمد بن عمر بن علی بن ابی طالب اپنے والد سے مرسلاً بیان كرتے ہیں كہ: آپ ‌صلی اللہ علیہ وسلم ‌نے اپنے بیٹے ابراہیم كی قبر پر( پانی) چھڑ كا

عبداللہ بن عباس رضی اللہ عنہما سے مرفوعا مروی ہے كہ: تین چیزوں میں شفا ہے۔ سینگی لگانے والے كی سینگی میں، یا شہد كے گھونٹ میں یاآگ سے داغنے میں اور میں اپنی امت كو داغنے سے منع كرتا ہوں

انس بن مالك‌رضی اللہ عنہ سے مرفوعا مروی ہے كہ: دو آوازیں ملعون ہیں۔ خوشی كے وقت ساز كی آواز اور مصیبت كے وقت نوحے كی آواز۔

صہیب رضی اللہ عنہ كہتے ہیں كہ رسول اللہ ‌صلی اللہ علیہ وسلم ‌اپنے صحابہ كے ساتھ بیٹھے تھے۔ اچانك مسكرا دیئے۔ آپ صلی اللہ علیہ وسلم نے فرمایا: كیا تم پوچھو گے نہیں كہ میں كیوں مسكرایا؟ صحابہ نے كہا: اے اللہ كے رسول! آپ كس وجہ سے مسكرائے؟ آپ صلی اللہ علیہ وسلم نے فرمایا: میں مومن كے معاملے سے خوش ہوا۔ اس كا سارے كا سارا معاملہ بھلائی ہے۔ اس كی پسندیدہ چیز اسے مل جائے تو اللہ كا شكر كرتا ہے، اور یہ اس كے لئے بہتر ہے۔ اگر نا پسندیدہ چیز سے اس كا سامنا ہو جائے تو صبر كرتاہے، اور یہ اس كے لئے بہتر ہے۔ مومن كے علاوہ كوئی بھی شخص ایسا نہیں جس كا سارے كا سارا معاملہ بھلائی ہو

انس بن مالك‌رضی اللہ عنہ سے مروی ہے كہ رسول اللہ ‌صلی اللہ علیہ وسلم ‌نے فرمایا: مومن (کا معاملہ) عجیب ہے ، اللہ تعالیٰ اس كے لئے جس چیز كا فیصلہ كرتا ہے اس كے لئے وہ بہتر معاملہ ہوتا ہے

ابو ہریرہ‌رضی اللہ عنہ كہتے ہیں كہ رسول اللہ ‌صلی اللہ علیہ وسلم ‌نے فرمایا: اللہ تعالیٰ فرماتا ہے: جب میں اپنے مومن بندے كو آزماتا ہوں اپنی عبادت کرنے والوں سے میرا شکوہ نہیں كرتا تو میں اسے اپنے قیدیوں سے آزاد كردیتا ہوں۔ پھر اس كے گوشت كو بہتر گوشت سے بدل دیتا ہوں، اس كے خون كو بہتر خون سے بدل دیتا ہوں، پھر وہ نئے سرے سے عمل كرتا ہے

عرباض بن ساریہ رضی اللہ عنہ سے مرفوعا مروی ہے كہ اللہ تعالیٰ فرماتا ہے: جب میں اپنے بندے سے اس كی دو محبوب چیزیں چھین لیتا ہوں حالانكہ وہ اسے انتہائی پسند كرتا ہے اور وہ اس معاملے پر میری تعریف كرتا ہے تو میں اس کے لئے جنت كے علاوہ كسی اور ثواب پر راضی نہیں ہوتا ۔

ابو ہریرہ‌رضی اللہ عنہ سے مروی ہے كہ:نبی ‌صلی اللہ علیہ وسلم ‌نے فرمایا:اللہ تبارك وتعالیٰ روح كے لئے فرماتا ہے: نكل، روح كہتی ہے: میں اس معاملے كو نا پسند كرتے ہوئے ہی نكلوں گی(اللہ تعالیٰ فرماتا ہے: نكل، اگرچہ تجھے نا پسند ہی كیوں نہ ہو۔)

ابو ہریرہ‌رضی اللہ عنہ كہتے ہیں كہ نبی ‌صلی اللہ علیہ وسلم ‌كے پاس سے ایك جنازہ گزرا تو آپ كھڑے ہو گئے اور فرمایا: كھڑے ہو جاؤ، كیوں كہ موت كے لئے ایك گھبراہٹ ہے۔

سلمی رضی اللہ عنہا ابو رافع رضی اللہ عنہ كی بیوی سے مروی ہے كہ: جب كسی كے سر میں درد ہوتا تو آپ صلی اللہ علیہ وسلم ‌اس سے كہتے: جا ؤ اور سینگی لگواؤ، اور جب کسی كی ٹانگ میں درد ہوتا تو اس سے كہتے: جاؤ اور اسے مہندی سے رنگ دو(مہندی لگاؤ)۔

عائشہ رضی اللہ عنہا سے مرفوعا مروی ہے كہ: آپ ‌صلی اللہ علیہ وسلم ‌جب بیمار ہوتے تو جبریل علیہ السلام آپ كو (ان الفاظ سے) دم كرتے: اللہ كے نام كےساتھ، جو آپ كو ہر بیماری سے شفا دے، ہر حسد كرنے والے كے شر سے ،جب وہ حسد كرے اور ہر نظر لگانے والے كے شر سے۔

ائشہكہتی ہیں كہ آپ ‌صلی اللہ علیہ وسلم ‌ان كلمات كے ساتھ پناہ مانگا كرتے تھے:( اے اللہ! لوگوں كے رب!) بیماری كو دور كردے، اور شفا دے دے، تو ہی شفا دینے والا ہے، تیری شفا كے علاوہ كوئی شفا نہیں، ایسی شفا جو بیماری نہ چھوڑے، جب آپ اپنے مرض الموت میں بوجھل ہوگئے۔ تو میں نے آپ كا ہاتھ پكڑ كر آپ كے جسم پر پھیرا ، اور یہی كلمات كہے،آپ نے اپنا ہاتھ میرے ہاتھ سے چھڑا كر كہا: اے اللہ مجھے بخش دے ، اور مجھے رفیق اعلیٰ سے ملادے، عائشہ رضی اللہ عنہا كہتی ہیں كہ یہ آخری كلام تھا جو میں نے رسول اللہ صلی اللہ علیہ وسلم سے سنا۔

خارجہ بن صلت رحمۃ اللہ علیہ اپنے چچا(علاقہ بن صحار)سے بیان كرتے ہیں كہ وہ ایك قوم كے پاس سے گزرے، تو وہ ان كے پاس آئے اور كہنے لگے: تم اس آدمی (رسول اللہ صلی اللہ علیہ وسلم ) كے پاس سے خیر لے كر آئے ہو۔ اس آدمی کو دم کرو، وہ اس آدمی كو لے كر آئے۔ جو بیڑیوں میں جكڑا ہوا تھا۔ علاقہ بن صحار نے اس آدمی كو تین دن صبح وشام دم كیا۔ جب بھی وہ دم ختم كرتے تو تھوك جمع كرتے، پھر اس پر تھوك پھینكتے۔ اس طرح محسوس ہوتا گویا وہ رسیوں میں سے كھل رہا ہے۔ انہوں نے اسے كچھ دیا، وہ نبی ‌صلی اللہ علیہ وسلم ‌كے پاس آئے اور آپ سے اس كا تذكرہ كیا۔ نبی ‌صلی اللہ علیہ وسلم ‌نے فرمایا: كھاؤ كتنے ہی لوگ جھوٹے دم كے ذریعے كھاتے ہیں، تم تو سچے دم كے ساتھ كھا رہے ہو

عبداللہ بن عباس رضی اللہ عنہما سے مروی ہے كہ: نبی ‌صلی اللہ علیہ وسلم ‌نے ان كی بیٹی كو لیا جو موت كے قریب تھی۔آپ صلی اللہ علیہ وسلم نے اسے گود میں لیااور آپ نے اسےاپنے سینے سے لگایا، وہ آپ كی گود میں ہی فوت ہوگئی، ام ایمن رضی اللہ عنہا كی چیخ نكل گئی، ان سے كہا گیا: كیا تم رسول اللہ ‌صلی اللہ علیہ وسلم ‌كے پاس رو رہی ہو؟ وہ كہنے لگی:اے اللہ كے رسول ! كیا میں آپ كو روتا نہیں دیكھ رہی؟ آپ صلی اللہ علیہ وسلم نے فرمایا: میں رو نہیں رہا، یہ تو رحمت ہے، مومن تو ہر حال میں بھلائی میں ہوتا ہے، روح پہلو میں سے نكلتی ہے تب بھی وہ اللہ كی حمد كرتا ہے