The root of this word, its grammatical form, and every other place in the Quran where the same root is used - with each of those verses one click away.
کَتَمْتُہٗ (ن) کَتْمًا وَکِتْمَانًا کے معنی کوئی بات چھپانا کے ہیں۔قرآن پاک میں ہے۔ (وَ مَنۡ اَظۡلَمُ مِمَّنۡ کَتَمَ شَہَادَۃً عِنۡدَہٗ مِنَ اللّٰہِ) (۲۔۱۴۰) اور اس سے بڑھ کر ظالم کون ہے جو خدا کی شہادت کو جو اس کے پاس کتاب اﷲ میں موجود ہے چھپائے۔ (وَ اِنَّ فَرِیۡقًا مِّنۡہُمۡ لَیَکۡتُمُوۡنَ الۡحَقَّ وَ ہُمۡ یَعۡلَمُوۡنَ) (۲۔۱۴۶) مگر ایک فریق ان میں سیچ بات جان بوجھ کر چھپا رہا ہے۔ (وَلَا تَکْتُمْوا الشَّھَادَۃَ) (۲۔۲۵۳) اور (دیکھنا) شہادت کو مت چھپانا۔اور آیت کریمہ: (الَّذِیۡنَ یَبۡخَلُوۡنَ وَ یَاۡمُرُوۡنَ النَّاسَ بِالۡبُخۡلِ وَ یَکۡتُمُوۡنَ مَاۤ اٰتٰہُمُ اللّٰہُ مِنۡ فَضۡلِہٖ) (۴۔۳۷) جو خود بھی بخل کریں اور لوگوں کو بھی بخل سکھائیں اور جو (مال) خدا نے ان کو اپنے فضل سے عطا فرمایا ہے اسے چھپا چھاکے رکھیں۔میں کِتْمَانِ فَضْل سے کفرانِ نعمت مراد ہے اسی بنا پر اس کے بعد فرمایا: (وَ اَعۡتَدۡنَا لِلۡکٰفِرِیۡنَ عَذَابًا مُّہِیۡنًا) (۴۔۳۷) اور ہم نے ناشکروں کے لئے ذلت کا عذاب تیار رکھا ہے اور آیت کریمہ: (وَ لَا یَکۡتُمُوۡنَ اللّٰہَ حَدِیۡثًا ) (۴۔۴۲) اور خدا سے کوئی بات چھپا نہیں سکیں گے۔کی تفسیر میں حضرت ابن عباسؓ فرماتے ہیں کہ جب قیامت کے روز مشرکین دیکھیں گے کہ جنت میں وہی لوگ داخل ہورہے ہیں جو مشرک نہیں تھے تو جھٹ سے پکار اٹھیں گے۔ (وَ اللّٰہِ رَبِّنَا مَا کُنَّا مُشۡرِکِیۡنَ) (۶۔۲۳) خدا کی قسم!جو ہمارا پروردگار ہے ہم شریک نہیں بناتے تھے۔مگر اس کفے بعد جب ان کے ہاتھ پاؤں ان کے خلاف گواہی دیں گے تو اس وقت وہ تمنا کریں گے کہ خدا تعالیٰ سے کوئی بات نہ چھپائی ہوتی۔حسن بصری رحمۃ اﷲ علیہ فرماتے ہیں (1) ۔ کہ آخرت میں متعدد مواقع ہوں گے بعض موقعوں پر وہ اپنی حالت کو چھپانے کی کوشش کریں گے اور بعض میں نہیں چھپائیں گے بعض نے کہا ہے کہ کوئی بات چھپانہ سکنے سے مراد یہ ہے کہ ان کے اعضاء انکے خلاف گواہی دیں گے۔
21 results